Анцәа Ду илҧха рымазааит асаит «akaamet.net» аҧызҵаз! Шәара, ҳаҭыр зқәу ҳфорум ахархәаҩцәа, ишәымоуп алшара ари асаит аҭаара, уи аҭҵаара, уиала шәгәалаҟара ашьҭыхра. Иахьа абраҟа ишәзанаҳҵоит зыӡбахә ҳамоу асаит аҟынтә ажәабжьқәак.

1. Ари зны абыргцәа ахьеилатәаз рҩыза дыхҭаркит – «Иҟалазеи, уанаџьалбеит, ҧҳәыск уара узы дышҧаҟамлеи? Ҧҳәысда, хшарада уҽуражәит. Абри змааноу ҳауҳәароуп» – ҳәа. Ихҭаркыз аҧхьаӡа дкәанызануан, аха нас – «Ас сыгәхьаа шәагозар, сҭоурых шәасҳәап», – иҳәеит. Саныҷкәыназ ӡӷабки сареи ҳаигәаҧхеибашьеит. Аҿа лсырҳәеит, ачара аҽҳәарагьы ҧҵәаны иҟан. Мышкы зны рқыҭа савсны сышцоз, сгәы иамузт рыҩны шыҟоу амҩала сцап, џьара харантә акәзаргьы дызбозар сҳәан, сышнеиуаз лара лхаҭа агәашә дылагылан. Аҧсшәа еибаҳҳәеит, – «Уааи, умҩахыҵ», лҳәеит. – «Ҟаҳ, ҟалашьа амоума, бани баби сырбар ҧхашьароуп» – сҳәан, исымурц салагеит. – «Урҭ ыҟаӡам, уахагьы иҟалаӡом», – лҳәеит. – «Баби бани ыҟамкәа ҳхала ҳаидырбалар нас ауаа рыбызқәа шыҟоу бдыруеит»… – ҳәа салаган, – «Уигьы агьаурым», – лҳәеит, «усгьы ирлас ҳаибагараны ҳаҟоуп, уи адагьы амш ахәлара иаҿуп, уабацои ҵхыбжьон, умҩахыҵ» – лҳәан, аҩныҟа сналгеит. Иаарласны схәы, сыҧхь лырхиеит. Краҳфеит, краҳжәит. Сара стәаны сахьлыхәаҧшуаз сгәы ҭгәырӷьаауан, ӡӷаб ӷәӷәак, еилҟьак Анцәа дахьсаҭәеишьаз. Сара усгьы ижәбо соуп, саныҷкәыназгьы абас сцәыхьӡа сыҟан. Ус сышьҭаларҭагь лырхиет. Сҽааилысхын ацәашьқәа ырцәан санышьҭала, ларгьы ауада дааҩнлан лҽеилылхын днасыкәаиеит. Сгәы насыҵасын снапы аалыкәсыршеит. Ларгьы убри дазыҧшызаарын лнапы насыкәлыршан, ани лымч ҭазза иҟамзи, слырӷәӷәацәеит. Саргьы ас ҟалоит ҳәа сахьазыхиамыз акәхап, амашәыр сымпыҵҟьеит. – «Ааат, абри иоума сара хаҵас исықәнагаз, раҧхьатәи ҳаицышьҭалараан абас сзызуыз» – лҳәан данҩаҵҟьа, аусқәа шҽеимхоз еилыскаан сымаҭәақәа сывараҿ асқам иахьықәыз неизыҳәҳәаны инасгәыҵаскын, сҧенџьыр сынкылҧеит. Уи ашьҭахь ҩынтәҟа, хынтәҟагьы аҧҳәысаагара сгәы иҭаскьхьан, аха ани сымаҭәақәа сгәыҵырҟәыҟәлан сқәасқәасуа рымӡырха сықәсны санцоз анаасгәалашәалак снаҟәыҵгәышьон. Убри оуп сара сҭоурых.

2. Аӡәы ӡӷаббара ҳәа џьара днеит. Ицара аамҭа анааи, иҽы ахьҿаҳәаз ахь дандәықәла, аҭыҧҳагьы иҽыжәлашьа збоит ҳәа дишьҭалеит. Ишьапы ашькыл иҭаргыланы данеиха, амашәыр импыҵҟьеит. Аӡӷаб дахьгылаз «Фуу!» лҳәеит. Аҷкәынгьы дааиҵамхакәа – Иа, Анцәа биныҳәааит! Абыржәы фу бымҳәазҭгьы ҳаимгәаблаа ҳамцоз – иҳәеит.

3. Маҳәык зны иабхәараа дырҭааит. Крифеит, крижәит, маҷаркгьы рыман, идыржәит. Иифаз акәу, амаҷар акәу изхарахаз уара идыр, дычуа далагеит. Ицара аамҭа анааи – «Анаџьалбеит санҽыжәло машәырк смыхьааит», – иҳәан, иҽирӷәӷәан, егьын дҽыжәлеит. Арахь аҧшәмацәа иҽаӷәра кны доурышьҭуам ацәажәара иаҿуп. Аусқәа цәгьахозшәа аниба, скьарахә ааҭганы схысып, ани абыжьгьы уахь иаласырӡып иҳәан, икьарахә ааҭиҧаан даҵхеит. Аха рыцҳарас иҟалаз, икьарахә еибамгеит. Иабхәа дахьгылаз днаиҵаҧшын – «Кьарахәс иумоу ҳәа агьыҟам, аха уаҳәла уеибыҭоуп», – иҳәеит. Амаҳәгьы ашҭа дыҭҟьаны дцеит. Жәохәҟа шықәса иабхәараа рахь дкылсуамызт. Аҵыхәтәан ирхашҭхьазаргь уажәшьҭа ирхашҭхьеит ҳәа анигәахә, ддәықәлеит. Уа дахьнеиз жәохә шықәса мҵхьази, иабхәараа рыҩны ахьыҟаз дақәымшәеит. Ҷкәына ҵәрышкәак дибан – «Уара абригьы-абригьы дахьынхо сақәшәом,диахьыҟоу удыруама? – ҳәа диазҵааит. – «Ааи, абра аҩадахьы ауп, сара унаскьазгоит», – иҳәан днаиаҧысит. – «Ҳаит, Анцәа уиныҳәааит, ҷкәына еилҟьак уоуп, иухыҵуеи баба», – ҳәа дҵааит амаҳә. – «Ус шықәсыла исыздырам, аха абни захь уцо имаҳә машәыр анизиу ашықәсан сиит, лҳәоит нана», – аҭак ииҭеит аҷкәын.